«Don’t deny, baby». եվրատեսիլյան երգը փոքրիկ իրարանցում է առաջացրել

Երեկ՝ մարտի 12-ին, վերջապես կայացավ Հայաստանը «Եվրատեսիլ-2015» երգի միջազգային մրցույթում ներկայացնող` «Genealogy» խմբի երգի տեսահոլովակի պրեմիերան, որից պարզ դարձավ, որ Հայաստանից խմբին միանում է Ինգա Արշակյանն, ով եվրատեսիլյան բեմում ելույթ ունենալու փորձ մեկ անգամ արդեն ունեցել է:

Այս տարի «Եվրատեսիլ»-ում Հայաստանի ասելիքն այլ է: Հայոց Ցեղասպանության 100-րդ տարելիցի առթիվ Հանրային հեռուստատեսության ստեղծագործական անձնակազմը, ում վստահված է կատարել մասնակցի ընտրությունը, ոոշեց այս տարի մրցույթին ներկայանալ միանգամայն նոր ձեւաչափով: Հատուկ մրցույթի համար ձեւավորված խումբը կոչվեց «Genealogy», որը թարգմանաբար նշանակում է ծագումնաբանություն:

Այն համախմբում է 1915 թվականին Ցեղասպանությունից փրկված եւ աշխարհի 5 մայրցամաքներ սփռված հայ ժողովրդի նոր սերնդին: Գաղափարն ինքնին վատը չէ, արտիստներն էլ, ովքեր ընդգրկված են խմբում, անշուշտ, տաղանդավոր են եւ հայտնի իրենց երկրներում: Եվրատեսիլյան մեր երգն էլ, որը կոչվում է «Don’t deny» («Մի՛ ժխտիր»), գրվել է՝ հավատարիմ մնալով խմբի ձեւաչափին եւ ասելիքին: Սակայն երգի բառերը փոքրիկ իրարանցում են առաջացրել համացանցում: «Don’t deny, baby» արտահայտությունը շատերի մոտ զարմանք է առաջացրել: Մենք գիտենք, որ «baby»-ն անգլերենից թարգմանաբար նշանակում է փոքրիկ, որը նաեւ փաղաքշական դիմելաձեւ է, որով մարդիկ դիմում են իրենց սիրելիներին, եւ երեկվանից Facebook-ի օգտատերերին մի հարց է տանջում. «ո՞ւմ է ուղղված «baby»-ն»:

«Եվրատեսիլի» հայաստանյան պատվիրակության ղեկավար Գոհար Գասպարյանը երգի մասին ասել է. «Մենք համագործակցել ենք բազմաթիվ հայ կոմպոզիտորների եւ խոսքերի հեղինակների հետ: Հանրային հեռուստաընկերության ստեղծագործական թիմի ընտրությունը կանգ առավ կոմպոզիտոր Արմեն Մարտիրոսյանի եւ խոսքերի հեղինակ Իննա Մկրտչյանի համատեղ աշխատանքի վրա: Երգը համամարդկային արժեքների մասին է, իսկ ասելիքը մեկն է. «Երջանկությունը ծնվում է, երբ մարդիկ միասնական ու հաշտ են միմյանց հետ (ընտանիքում, սիրային եւ այլ հարաբերություններում): Սերունդները փոխվում են, բայց ծագումնաբանությունը՝ ոչ, ուստի սիրո ու համերաշխության արժեքները մնայուն են»:

Մնում է հուսալ, որ երգի եւ տեսոհոլովակի ասելիքն իսկապես տեղ կհասնի եւ ոչ մի «baby» չի խանգարի, որպեսզի մեր ձայնը լսելի դարձնենք աշխարհին: